CFA 2025: AEE vle rive jwenn plis pase 100 000 timoun

Asosyasyon pou Evanjelizasyon Timoun yo (AEE) ann Ayiti ap prepare pou lanse pwogram fen ane li, Klèb Fen Ane (CFA) 2025. Gwo inisyativ sa a vle rive jwenn 105 800 timoun nan tout peyi a lè li òganize 1 600 klèb pandan sezon fèt yo.

CFA a, yon inisyativ AEE fè chak ane, se yon seri klèb ki fèt nan fen ane a. Tèm edisyon sa a, « Yon anivèsè retwospektif », ap gide monitè ak timoun yo nan yon refleksyon pwofon sou lafwa, nan fondasyon biblik yo ak sa nesans Kris la vle di.

Nan chak klèb

• Ansèyman biblik: timoun yo aprann yon istwa biblik sou tèm ane a.
• Memorizasyon: yo aprann vèsè pa kè pou Pawòl Bondye a rete nan kè yo.
• Animasyon: chante, jwèt revizyon ak aktivite kreyatif ranfòse sa yo aprann nan yon fason ki amizan.

AEE a apiye sou yon metòd ki fè prèv li: fòmasyon monitè yo. Se gras a monitè sa yo ki fòme epi ekipe, mesaj la rive jwenn timoun yo byen. Se yo ki poto mitan gwo travay sa a, epi yo asire bon kalite ansèyman biblik la nan 1 600 klèb yo.

Nan yon kontèks kote timoun yo ap fè fas ak anpil difikilte, inisyativ sa a se yon reyon espwa ki pote yon mesaj pozitif ak valè kretyen.

Sipòte CFA 2025 la

Pou pwojè sa a ka reyalize, AEE ap lanse yon apèl pou kolaborasyon. Sipòte CFA 2025 la, se mete men ansanm pou:

• finanse fòmasyon monitè yo;
• òganize 1 600 klèb yo nan tout peyi a;
• bay plis pase san mil timoun chans pou tande mesaj sali a.

Lè nou mache men nan men, patnè, legliz ak volontè ka ede sove jenerasyon sa a pou Seyè a epi asire avni espirityèl timoun ann Ayiti.